ភ្នំពេញ៖ ក្រសួងការងារ និងបណ្ដុះបណ្ដាល វិជ្ជាជីវៈ ប្រកាសថា ប្រាក់ឈ្នួលអប្បបរមារបស់ កម្មករនិយោជិតផ្នែក វាយនភណ្ឌកាត់ដេរ និងផលិតស្បែកជើង ឡើងបាន៦ដុល្លារសម្រាប់ឆ្នាំ២០២៣ ស្មើនឹងចំនួន ២០០ដុល្លារក្នុងមួយខែ។ នេះបើយោងតាមសេចក្ដីប្រកាសរបស់ក្រុមប្រឹក្សាជាតិប្រាក់ឈ្នួលអប្បបរមានៅថ្ងៃទី២១ ខែកញ្ញានេះ។

ក្នុងសេចក្ដីថ្លែងការណ៍ចុះថ្ងៃទី២១ ខែកញ្ញានេះ ក្រុមប្រឹក្សាជាតិប្រាក់ឈ្នួលអប្បបរមាការបោះឆ្នោតសម្រេចលើប្រាក់ឈ្នូលអប្បបរមាបានសម្រេចលើតម្លៃ ១៩៨ដុល្លារអាមេរិកជាប្រាក់ឈ្នួលទាបបំផុតសម្រាប់កម្មករនិយោជិតផ្នែកវាយនភណ្ឌ កាត់ដេរ ផលិតស្បែកជើង និងកាបូបធ្វើដំណើរដែលនឹងចាប់អនុវត្តចាប់ពីថ្ងៃទី១ ខែមករា ឆ្នាំ២០២៣ តទៅ។

បន្ថែមលើនេះតាមប្រកាសស្ដីពីការកំណត់ប្រាក់ឈ្នួលអប្បបរមានសម្រាប់កម្មករនិយោជិតផ្នែកវាយនភណ្ឌកាត់ដេរ ផលិតផលស្បែកជើង និងផលិតផលធ្វើដំណើរនិងកាបូបសម្រាប់ឆ្នាំ២០២៣ ក្រសួងការងារដោយយោងតាមអនុសាសន៍របស់នាយករដ្ឋមន្ត្រីសម្ដេចតេជោ ហ៊ុន សែន បានសម្រេចបន្ថែមទឹកប្រាក់ ២ដុល្លារបន្ថែមទៀតលើប្រាក់ឈ្នួលដែលបានសម្រេចដែលធ្វើឱ្យប្រាក់ខែរបស់កម្មករក្នុងឆ្នាំ២០២៣ខាងមុខមានតម្លៃយ៉ាងហោចណាស់ ២០០ដុល្លារក្នុងមួយខែ។

គួរឱ្យដឹងផងដែរថា ប្រាក់ឈ្នួលអប្បបរមារបស់កម្មករនិយោជិតផ្នែក វាយនភណ្ឌកាត់ដេរ និងផលិតស្បែកជើង សម្រាប់ ឆ្នាំ២០២២ គឺ១៩៤ដុល្លារ៕